الرئيسية / حوارات / الحبس كيمشيو ليه غير الرجال

الحبس كيمشيو ليه غير الرجال

بابوبي: مبروك عليك المصادقة على قانون الصحافة والنشر

الخلفي: هنيئا لينا كلنا، هاد القانون ما درتوش ليا. أنا أصلا مابقيتش صحفي أنا وزير. درتو ليكم باش ما تبقاوش تقولو ليا ما درتي والو للزملاء السابقين ديالك، ملي جيت وأنا باغي نديرو ليكم فعلا جاب الله التيسير ودوزتو ليكم وبالإجماع .

بابوبي: اللي يسمع الإجماع يقول هنا نبات ياكما كاملين تا 70 نائب والمجلس فيه 395 واحد؟

الخلفي: العدد ماشي مهم. كمشة ديال النحل ولا شواري دبان. المهم هو درتو ليكم. وزايدون بان ليك الحضور غير فهاد القانون، البرلمان ديما كيصفر فقانون المالية وقانون تشغيل القاصرين وجلسات الأسئلة الشهرية ما كيعمر تا كيجي سيدنا بغيتي تا يكون القانون ديالي عاد يعمرباش نبقاوغيرنهضرو وما يدوزش هادشي كاع.

بابوبي: بعد التصويت، عرضتي على النقابة ديال الصحفيين للفطور، قل ليا الأمور هانية؟

الخلفي: واش الأمورعاد ولات هانية، الدنيا هانية من من شحال هادي، ملي كيسخن عليهم راسهم كنكاليمهم بشي عراضة فشي فندق محترم كايكلو و يشربو و كيبردو السوق. ما يقدروش يهضرو معايا من نهار جبت ليهم الدعم.

بابوبي: واش الصحفيين ما بقاوش غادي يمشيو للحبس ورا هاد لقانون؟

الخلفي: لا لا لا سمح ليا أسي بابوبي ما يمكنش أنا جيت حتى ل 2016 ونحيد للصحفيين هاد المكسب ديال الحبس، حيت الحبس كيمشيو ليه غير الرجال. اللي درت هو أنه ما كاينش العقوبات الحبسية فالقانون كايينين غير لغرامات وحيت الصحفيين مكردين. ما غاديش يقدرو يخلصوها غاديين يمشيو للحبس .

بابوبي: اللي بغيت نقول ليك هو باقي كاين شي حالات يقدر فيها الصحفي يمشي للحبس.

الخلفي: هادكشي ديال الحبس ما تبقاش تسولني عليه، أنا حيدتو من عندي ولصقتو للقضاء. اللي مس المقدسات غادي يمشي للمحكمة يتفاهمو معاه. واش بغيتو هاد لبلاد ما يبقى فيها تا حاجة موقرة. يمشي عند القاضي، وهو اللي غادي يفهم حسن منا كيفاش يعاقب اللي ضسر على المقدسات…سي كليغ ؟

بابوبي : سي كليغ… اللي ماكليغش هوما كاينش سقف ديال العقوبات

الخلفي: ونتا مناش خايف؟ هاد التعويضات غادي تكون على هادوك اللي كيبسلو على المسؤولين ديالنا و كيبداو يفضحو فيهم فالصحافة وكيقولو عليهم اللي كاين، أما اللي ماكاينش ماكنديوهاش فيه غير قول. هاد القانون مزيان لينا وليك غادي نرجعو هيبة الدولة وغادي نحيدو ليكم من السوق بزاف ديال المنافسين.

بابوبي: هاد الصلابة اللي درتيها ففرض قانون الصحافة ما درتيهاش فدفاتر التحملات؟

الخلفي: جوسوي كليغ… جوسوي كليغ.

عن azapress

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *